Khamiis, December, 23, 2021 (HOL) - Madaxweynaha dowladda Federaalka Soomaaliya Maxamed Cabdullaahi Farmaajo ayaa kulan la qaatay guddoomiyaha gobolka Banaadir, Taliyeyaasha ciidamada xoogga dalka, Booliska iyo Nabad Sugidda Qaranka, guddoomiyeyaasha iyo Taliyeyaasha Degmooyinka gobolka Banaadir, kaasoo ahaa mid uu kaga xog-waraystay xaaladda amniga, bilicda, dhaqaalaha iyo fayo-dhowrka gobolka Banaadir.
Madaxweyne Farmaajo ayaa ka digay saameynta maandooriyaha uu ku leeyahay xasiloonida iyo horumarka dalka, isagoona sheegay in muhiimad weyn ay leedahay in la xoojiyo wadashaqeyn dhexmarta shacabka Caasimadda, maamulka gobolka iyo laamaha amaanka, si looga hortago khatara maandooriyaha uu ku haayo dhalinyarada.
“Dalkeenna waxaa ku soo xoogeystay khatarta cadow ay tahay in aan si adag u wajahno, dhammaanteenna aynu u wada istaagno sidii aan uga badbaadin lahayn ubadkeenna. Cadowgaas oo ah Maandooriyaha ku soo badanaya dalkeenna ee khatarta ku ah xasiilloonida waddanka iyo mustaqbalka ubadka Soomaaliyeed”ayuu yiri madaxweyne Farmaajo.
Waxuu intaasi ku daray madaxweyne Farmaajo inuu ka xunyahay falal uu sheegay in magac dil uu ku yahay laamaha amniga oo ay mararka qaar ku kacaan askar uu sheegay ineyaan fahamsaneen waajibaadka ka saaran badqabka dadkooda, isagoona amar ku siiyay Taliyeyaasha ciidamada ee heer Fedaraal, heer gobol iyo heer degmo iney gacan bir ah ku qabtaan cid walba oo amaanka qalqal galineysa.
Gabagabadii guddoomiyaha gobolka Banaadir, Taliyeyaasha Xoogga dalka, Booliska iyo Nabad-sugidda ayaa uga warbixiyey Madaxweynaha xaaladda amni ee caasimadda iyo qorsheyaasha heer gobol ee ku aadan nabadda dib u dhiska iyo horumarinta gobolka Banaadir.