Khamiis, November, 18, 2021 (HOL) - Ciidamo tirradoodu dhantahay 200 oo askar, oo wata 10 baabuur oo tikniko ah, ayaa ka goostay milliteriga Somaliland kuna biiray jabhada SSC ee baryo ka dagaalami jirtay bariga Somaliland.
"Ciidamada aan wataa waxay ka tirsanayeen guutada 151aad, waxayna usoo diga rogteen ciidanka SSC ee Cayn, tirrada ciidanku waa 200, gaadiidku waa 10 tikniko ah, waxaana jiri doona 3 qori oo halkan lagu soo bandhigi doono oo ay naga curyaamisay mamul ku sheega SNM" Baashe Cabdillaahi Yuusuf oo ah taliyaha ciidanka goostay ayaa sida yidhi.
Baashe ayaa sheegay in maanta laga bilaabo ay u shaqaynayaan SSC, waxaanu ku andacooday in gobolada barigu anay Somaliland ka mid ahayn oo Somaliland xoog ku haysato.
"Maanta go'aan kayagu wuxuu yahay in aanu u shaqayno dadkayaga iyo dalkayaga, una shaqayno SSC, oo aanu ugu shaqayno si hagarla'aan ah, caddaalad ah iyo sinaan ah, waxaanu uga soo go'nay madama oo dadka Sool, Sanaag iyo Cayn dagaa anay Somaliland ahayn oo ay yihiin dad Somaliland kusoo duushay" ayuu yidhi Baashe.
Qaybo kamid ah dadwaynaha magaalada Buuhoodle ayaa duleedka magaalada kusoo dhaweeyay, kadib markii ay ciidanku soo gaadheen magaalada.