Khamiis, Janaayo, 27, 2022 (HOL) - Shirka todobaadlaha ee Golaha Wasiiradda Xukuumadda Xilgaarsiinta
Soomaaliya oo uu shir guddoomiyay Raysal wasaare Maxamed Xuseen Rooble
ayaa maanta looga hadlay arrimo la xariiray doorashooyinka dalka, Amniga
iyo ciidamadii la geeyay magaalada Baledweyne.
Golaha wasiiradda
ayaa isku raacay in si deg deg ah looga soo saaro magaalada Baledweyne
ciidamadii la geeyay, waxaana la faray taliyeyaasha in ciidamada qaranka
aanan la sumcad dilin oo lagu soo koobo shaqadooda si dhaqsa ahna loogu
soo celiyo xerooyinkii laga qaaday.
"Golaha Wasiirrada ayaa
isku raacay in ciidammada la geeyay magaalada Beledweyne sida ugu
dhaqsiyaha badan looga soo saaro, laguna celiyo xeryahoodii, iyadoo la
faray Wasiirada iyo Taliyeyaasha amniga in aan Ciidammada Qaranka loo
isticmaalin laguna sumcad dilin arrimaha siyaasadda laguna koobo
shaqadooda ah sugidda Amniga Dalka" ayaa lagu yiri qoraal kasoo baxay
Golaha wasiiradda.
Raysal Wasaare Rooble ayaa
magacaabay Guddi Wasiirro ah Hirshabelle iyo Waxgaradka Baledweyne kala
shaqaynaya dajinta Xiisadda iyo xal u helista Khilaafka taagan, kuwaas
oo kala ah:-
1:Jenaraal Mukhtaar Xuseen Afrah Wasiirka Arrimaha Gudaha Guddoomiye
2:Cabdullaahi Maxamed Nuur Wasiirka Wasaaradda Amniga Gudaha Gudoomiye kuxigeenka
3:Khaliif Cabdi Cumar Wasiirka Wasaaradda Ganacasiga iyo Warashada Xubin
4:Cabduqaadir Maxamed Nuur Wasiirka Gaashaandhigga Xubin
5:Fowsiya Abiikar Wasiirka Wasaaradda Caafimaadka iyo Darryeelka Bulshada Xubin
Golaha
waxay sidoo kale ka doodeen cabsi gelinta argagixisadu ku hayaan
ganacsatada Soomaaliyeed ee suuqa Bakaaraha, iyagoonaa faray Wasaaradda
Amnigu in ay qaaddo tallaabooiynka ku habboon.
Shalay ayay aheyd
markii magaalada Baledweyne laga dajiyay laba diyaaradood oo siday
ciidamo ka tirsan Haramcad iyo gorgor oo tiro ahaan gaarayay 100 askari,
kuwaas oo ay si weyn uga soo horjeesteen Xildhibaano iyo siyaasiyiin ka
tirsan beelaha Xawaadle.