Guddoonka baarlamaanka oo dib-u-dhigay kulankii wadajirka ee labada aqal
Isniin, November, 28, 2022 (HOL) - Guddoonka labada gole ee baarlamaanka Soomaaliya, ayaa
shaaciyay dib-u-dhigista kulankii wadajirka labada aqal ee baarlamaanka, kaas
oo maanta ka dhici lahaa xarunta Villa Hargeysa ee magaalada Muqdisho.
Ajandaha kulanka baaqday ayaa ahaa akhrinta 1-aad ee miisaaniyadda qaranka ee sannadka 2023.
Golaha Wasiirrada Soomaaliya ayaa bartamihii bishan ansixiyay
$967.7 oo ah miisaaniyadda dowladda ee sannadka 2023.
Guddoomiyaha Golaha Shacabka Sheekh Aadan Maxamed Nuur
Madoobe iyo Guddoomiyaha Aqalka Sare Cabdi Xaashi Cabdullahi, ma aysan
faahfaahin ujeedka baaqashada kulanka.
Balse, falanqeyayaasha arrimaha siyaasadda ayaa aamin in
baaqashada kulanka ay la xiriirto weerarka al Shabab ay ku qaadeen hotelka
Villa Rosa oo ku dhow Madaxtooyada Soomaaliya.
Weerarka ayaa ku bilowday qarax ismiidaamin ah, kaddibna rag
hubeysan ayaa galeen hotelka.
Afhayeenka booliska Soomaaliya Gaashaanle Sadiikh Doodishe,
ayaa sheegay in hotelka laga soo badbaadiyay dad shacab ah iyo masuuliyiin.
Wasiirro iyo xildhibaanno ayaa ku sugnaa hotelka la
weeraray, maadaama uu ku yaallo nawaaxiga Madaxtooyada, islama markaana
ammaankeeda aad loo ilaaliyo.
Hassan Istiila, Hiiraan Online
[email protected]
