Bangiga Adduunka oo sheegay in dhaqaallaha Soomaaliya uu kordhay 2.9% sannadkii 2021
Talaado, November, 29, 2022 (HOL) - Wasiirka maaliyadda Soomaaliya Dr. Cilmi Maxamuud Nuur ayaa
maanta shir-guddoomiyay shir sanadle ah oo uu soo qaban-qaabiyay Bangiga
Adduunka, laguna soo bandhigay warbxinta dhaqaallaha Soomaaliya (Economic
Outlook).
Warbixinta ayaa caddeysay in sannadkii 2021 dhaqaallaha
Soomaaliya uu kordhay boqolkiiba 2.9, marka loo eego sannadkii ka horreyay ee
2020.
Dr. Cilmi Maxamuud Nuur, ayaa hoosta ka xariiqay in ay dowladda
Federaalka Soomaaliya ay ka go'an tahay xoojinta iyo horumarinta dhaqaallaha
dalka si loo gaaro horumar la taaban karo.
“Dhaqaallaha Soomaaliya waxa uu sameeyay horumar, waana soo
hagaagayaa inkastoo ay jiraan caqabado gudaha ah iyo kuwo caalami ah. Waxa naga
go'an inaan xoojino barnaamijkeena dib-u-habaynta hannaanka maaliyadda"
ayuu yiri Wasiirka Maaliyaddu.
Warbxinta Sanadlaha ah ee Bangiga Adduunka ee la socodka
dhaqaalaha Soomaaliya, ayaa sidoo kale lagu xusay in abaaraha ba'an ee qeybo
badan oo dalka ka jira ay dhaqaallaha samayn xooggan ku yeesheen.
Wakiilka Bangiga Adduunka ee Soomaaliya Kristina Svensson
ayaa sheegtay in dowladda Soomaaliya ay horumar ka samasay dhanka dakhliga
gudaha iyo isbeddelka dib-u-habaynta nidaamka maaliyadeed ee dalka.
Madaxweynaha Jamhuuriyadda Federaalka Soomaaliya Xasan
Sheekh Maxamuud, ayaa shalay magaalada Muqdisho ka furay shirweynaha caalamiga
ah ee maalgashiga Soomaaliya.
Madaxweyne Maxamuud ayaa ka warbixiyey qorsheyaasha dowladda
ee ku aaddan xaqiijinta Soomaaliya ku habboon maalgashi, taas oo uu sheegay in
ay aas-aas u tahay dabar-goynta argagixisada, horumarinta shuruucda iyo
dowladnimada, dhismaha kaabeyaasha dhaqaalaha iyo ka mid noqoshada suuqyada iyo
ururrada caalamiga ah ee ganacsiga.
“In kastoo aan halkan u imid si aan u dhiirri-geliyo
maalgashiga dalkayga, haddana waa garowsanahay caqabadaha nagu xeeran oo ay ugu
horreyso argagixisada, abaaraha, hannaanka dhaqaalaha oo dib u habayn u baahan
iyo shaqo la’aanta dhallinyarada, haddana dhammaan arrimahaas waxaa barbar
socda dadaallo aan ku xallinayno iyo fursado ballaaran oo ka jira dalka.”
Hassan Istiila, Hiiraan Online
[email protected]
