Khamiis, February, 16, 2023 (HOL) - Madaxweynahii hore ee Soomaaliya Sheekh Shariif Sheekh Axmed ayaa ka
hadlay dagaalka ka socda maalintii 12 oo xariir ah magaalada laascaanood
ee xarunta gobolka Sool, kaasoo u dhaxeeya ciidamada Somaliland iyo
kuwa dadka deegaanka.
Sheekh Shariif Sheekh Axmed ayaa sheegay in
nasiib daro weyn ay tahay dagaalka wali ka socda magaalada Laascaanood
ee sababay khasaaraha kala duwan ee isugu jira dhimashada, dhaawaca,
barakaca iyo burburka hantiyadeed.
"Hadaba annagoo gudanayna
waajibka naga saran joojinta iyo xakamaynta dhiiga Umadda Soomaaliyeed
ayaan markale ku baaqaynaa joojinta dagaalka ka socda magaalada
Laascaanood si shuruud la'aan ah, waxaan xusuusinaynaa dadka
Soomaaliyeed iyo Bulshada Caalamka Casharka ugu muhiimsan ee laga
faa'iiday dagaalladii sokeeye ee ka dhacay Dalka Soomaaliya waa inaan
beeli beel kale xoog ku maquunin karin, awood ciidanna lagu gaari karin
ujeeddo siyaasadeed. Looma dulqaadan karo daadinta dhiigga Soomaaliyeed,
waxa ka socda magaalada Laascaanood waxaa lagu sifayn karaa dambiyo ka
dhan ah Bini'aadannimada, xad gudubna ku ah mucaahadaadka iyo xeerarka
caalamiga ah" ayuu yiri Sheekh Shariif
Wuxuu sidoo kale tilmaamay
in dagaalka uu sii kala fogeynayo dadka walaalaha ah, islamarkaana
natiijada laga dhaxlayo ay tahay khasaare kala duwan iyo naceyb keenaya
in lasii kala fogaado, wuxuuna ku baaqay in talaabo deg deg ah laga
qaado cid walba oo qeyb ka ah hurinta dagaalka ka socda Laascaanood.
"Duullaanka
socda waxaa laga dhaxlayaa oo qura, dhimasho, dhaawac, nacayb ay wiil
iyo abtigiis isnacaan, colaad mahadho ah iyo burbur hantiyadeed. Hadaba,
Si loo dabo qabto musiibada ayaan ku baaqayaa" ayuu yiri Sheekh Shariif
madaxweynahii hore ee Soomaaliya.
Gabagabadii Sheekh Shariif
Sheekh Axmed ayaa xusay afar qodob oo uu tilmaamay iney muhiim u yihiin
xal u helida dagaalka ka socda magaalada Laascaanood oo kala ah, in si
degdeg ah oo shuruud la'aan ah loo joojiyo xabadda, In ciidanka laga
dulqaado magaalada, In Isimada, culimada iyo waxgaradka labada beelood
ay kulan degdeg ah isugu yimaadaan iyo In Dowladda Federaalka Soomaaliya
ay adeegsato culays siyaasadeed iyo mid Diblimasi sidii nabad waarta
loogu soo dabbaali lahaa colaadda dabo dheeraatay.