Isniin, Luulyo, 17, 2023 (HOL) - Lataliyaha amniga madaxweynaha dowladda fedaraalka Soomaaliya Xuseen Macalin Maxamuud ayaa shaaca ka qaaday in ciidanka xoogga dalka Soomaaliya ay heleen hub culus iyo diyaarado ay u adeegsan doonaan la dagaalanka kooxda Al-shabaab.
Lataliyaha amniga madaxweyne Xasan Sheekh oo wareysi siiyay laanta afka Soomaaliga ee VOA-da ayaa sheegay in hubka ay heleen ciidanka dowladda uu isugu jiro Hoobiyaal, lidka diyaaradaha ee loo yaqaano Suuga iyo diyaaradaha qumaatiga u kaca ee Helikabtarka, wuxuuna sheegay inuu filayo in ciidanka ay u horseedi doonaan guulo la taaban karo.
"Dowladda Soomaaliya cuna qabateyntii hubka ee saarneyd sanad ka hor ayaa laga qafiifiyay, sidaas ayay dowladda bilihii lasoo dhaafay hubabka ku jiray kuwa xaaraanta ahaa ama lagu adkeyn jiray inay soo hesho Soomaaliya ay saaxiibo soo siiyaan qaarna ay soo gadatay, Waxa sido kale jira Helicopter hub saaran yahay oo loogu tala galay inta badan in dhaawaca lagu daabulo oo ciidanka Soomaaliya ay maanta leeyihiin, hubka waa weyn ee hoobiyeyaasha ee 120-ka oo ku jiray hubka ka xaaraanta ah dowladda Soomaaliya" ayuu yiri Lataliyaha Amniga Qaranka ee madaxweynaha Soomaaliya Xuseen Macalin Maxamuud.
Waxuu sidoo kale tilmaamay Xuseen Macalin Maxamuud in hubkan culus ay adeegsan doonaan ciidanka dowladda Soomaaliya, gaar ahaan kuwa sida gaarka ah loosoo tababaray oo kaga qeyb qaadan doona wajiga labaad ee howlgalada ka dhanka ah kooxda Al-shabaab oo la filayo inuu dhawaan bilaawdo.
Xuseen Macalin Maxamuud ayaa sidoo kale xusay in dowladda Fedaraalka ay haatan haysato ciidan ku filan oo Al-shabaab ka xureyn kara gobolada dalka, islamarkaana dowladda ay dadaal dheer ugu jirto sidii dalka looga qaadi lahaa cuna qabateynta hubka ee saaran mudada sanadaha ah si ay usoo iibsado hubka casriga ah noocyadiisa kala duwan.
Ugu dambeyntii Xuseen Macalin Maxamuud ayaa sheegay in dhamaadka sanadkan dalka Maraykanka lagu qaban doono shir dhaqaale loogu ururinayo dhismaha ciidanka xoogga dalka Soomaaliya si dowladda Fedaraalka ay awood ugu hesho iney ku filnaato ciidankeeda wixii ka dambeeya sanadka 2027.