Khamiis, March, 16, 2023 (HOL) - Wasiirka Wasaaradda Gaashaandhiga Xukuumadda Fedaraalka Soomaaliya Cabdulqaadir Maxamed Nuur iyo Danjiraha dowladda Mareykanka ee Soomaalya Larry Andre ayaa kala saxiixday heshiis la xariira tayaynta ciidamada xoogga dalka Soomaaliyeed, gaar ahaan kuwa Kumaandooska Danab.
Wasiirka Gaashaandhiga Soomaaliya ayaa sheegay in heshiiskaan uu yahay mid lagu xoojinaayo tababarada iyo qalabeynta ciidamada Kumaandooska Danab ee xoogga dalka Soomaaliyeed, si ay uga hortagaan qataraha ka imaanaya kooxda Al-shabaab.
Munaasabada ay heshiiskaan ku kala saxiixdeen Wasiirka Gaashaandhiga Xukuumadda Soomaaliya iyo Safiirka Mareykanka ee Soomaaliya waxaa goob joog ka ahaa Taliye ku xigeenka ciidanka xoogga dalka Soomaaliyeed Jenaraal Cabaas Amiin.
Wasiir Cabduqaadir Maxamed Nuur ayaa dowladda Mareykanka uga mahadceliyay taageerada ay siiyaan dowladda Soomaaliya, gaar ahaan ciidanka Kumaandooska Danab, isagoo xusay in dowladda Fedaraalka Soomaaliya ay ka go'an tahay dhismaha iyo tayaynta awooda ciidamada xoogga dalka.
Dowladda Maraykanka ayaa ka mid ah saaxiibada caalamiga ah ee dowladda Soomaaliya ka gacan siiya dhismaha ciidamada xoogga dalka, gaar ahaan ciidanka Kumaandooska Danab.
Bishii Janaayo ee sanadkaan 2023 ayay aheyd markii Safiirka dowladda Mareykanka u jooga Soomaaliya uu ku wareejiyay wasiirka Difaaca dowladda Soomaaliya hub, agab ciidan iyo gaadiid dagaal, taasoo uu sheegay wasiirka Gaashaandhiga in dowladda Mareykanka ay ugu talagashay dagaalka ka dhanka ah kooxda Al-shabaab.