Jimco, December 27, 2024 (HOL) - Xulka Qaranka 17 jirada Soomaaliya ayaa kaalinta sadaxaad ka galay maanta tartanka is reeb reebka AFCON U-17 CECAFA ZONE, kadib markii ay rigooreyaal kaga adkaadeen dhigooda dalka South Sudan.
Xulalka Qaranka 17 jirada Soomaaliya iyo South Sudan ayaa 90-kii daqiiqo ee cayaarta loogu talo galay ku kala baxay 2-2, waxaana taasi ay keentay in gool ku laad ku kala baxaan labada xul, waxaana gool ku laad yadii lakala tiirtay 4-2 ku badiyay Xulka Qaranka Soomaaliya.
Xiddigaha Badweynta Hindiya oo ku guul dareystay iney difaacdaan Koobkaan ayaa ugu dambeyn maanta cariirsaday iney tartankaam ka galaan kaalinta sadaxaad.
Ciyaaryahanada Soomaaliya waxaa tartankaan afar dhamaadkiisa ama Semafinalkiisa kusoo reebay Xulka Qaranka 17 jirada dalka Uganda oo sanadkaan ah martigaliyaasha tartankaan.
Ugu dambeyntii Macallinka Xulka Qaranka ee 17 jirada Soomaaliya, Kaaliyeyaashiisa, Madaxda ka socota Xiriirka iyo masuuliyiin kale ayaa ciyaaryahanada Xulka Badweynta Hindiya kula taliyay inay sii wadaan dedaalkooda si ay u gaaraan guulo kale oo muhiim ah.