Axad, Maarso, 10, 2024 (HOL) - Taliyaha guud ee Ciidamada Itoobiya Birhanu Jula oo Waraysi siiyay Warbaahinta EBC ayaa ka hadlay qodobo dhawr ah oo ay ka mid yihiin Ciidamada Itoobiya ee ku sugan qaybo kamid ah Soomaaliya, sababta ay u joogaan Ciidamadaas iyo waxa ay ka qabtaan gudaha Soomaaliya.
Taliyuhu waxa uu ugu horreyn sheegay in Ciidanka Itoobiya ee ku sugan Soomaaliya ay gacanta ku ku hayaan 60% Dhulka Soomaliya oo ay nabaddiisa ilaalinayaan, waxa kale oo uu sheegay in Ciidamada Itoobiya ay naftood u hurayaan nabadaynta Soomaaliya, waa siduu hadalka u dhigay Taliyaha Ciidamada Itoobiya.
Taliyuhu waxa kale oo uu sheegay in Ciidamada Itoobiya ee ku sugan Soomaaliya ay sababeen in Dowladda Soomaaliya ay fadhi ka dhigato Muqdisho, " Berri hadday Ciidamada Itoobiya ka baxaan Soomaaliya uma malaynayo in Dowladda Soomaaliya ay fadhiyayso Muqdisho" ayuu yiri Taliyaha Ciidamada Itoobiya Birhanu Jula.
Dhinaca kale Birhanu Jula waxa uu xusay in Dawlad goboleedyada Soomaliya ay intooda badan taageersan yihiin joogitaanka Ciidamada Itoobiya ee Soomaaliya, Taliyuhu waxa uu sheegay in haddii Ciidamada Itoobiya ay kasoo baxaan Soomaaliya ay shacabku odhanayaan "Waanu idin siiraaci" waa siduu hadalka u dhigay Taliyaha Ciidamada Itoobiya.
Joogitaanka Ciidamada Itoobiya ay joogaan Soomaaliya waxa uu Taliyaha Ciidamada Itoobiya ku sheegay inay halkaa u joogaan sugidda amniga dalka Itoobiya iyo in Soomaaliya laga difaaco Al Shabaab, sidaas darteed waxa uu Taliyuhu carrabka ku adkeeyay in gobollada Soomaaliya ee ay joogaan Ciidamada Itoobiya aysan ku wareejin doonin waxa uu ku sheegay Cadow, inkasta oo uusan qeexin waxa uu ka wado hadalkaa iyo cidda uu hadalkaa ula jeedo.
Ugu dambayn Taliyaha Ciidamada Itoobiya waxa uu sheegay in Dowladda Soomaaliya ay dafirtay wanaaggii aan u samaynay Soomaaliya, halka shacabka Soomaaliya ay umahad celinayaan Ciidamada Itoobiya isla markaana ay garanayaan naf huristii aan dartood u samaynay, waa siduu hadalka u dhigay Birhanu Jula Taliyaha Ciidamada Itoobiya.
Hadalka Taliyaha ayaa kusoo aadaya wakhti wali ay taagan tahay xiisadda ka dhex aloosan Soomaaliya iyo Itoobiya, taas oo daba socotay heshiiskii is afgarad ee billowgii sannadkan ku dhex maray Addis Ababa Dowladda Itoobiya iyo Somaliland, heshiiskaas oo lasoo sheegayo in Dowladda Itoobiya ay dib uga fiirsanayso ka laabashadiisa.