Sabti, February 22, 2025 (HOL) - Madaxweynaha dowladda Federaalka Soomaaliya Xasan Sheekh Maxamuud oo maanta si rasmi ah u furay Kalfadhiga 6-aad ee Baarlamaanka 11-aad ee dalka ayaa ku bogaadiyey guddoonka, xubnaha Golaha Shacabka iyo Aqalka Sare shaqadii baaxadda lahayd oo ay soo qabteen kalfadhiyadii hore ee Baarlamaanka.
Madaxweyne Xasan Sheekh Maxamuud ayaa Baarlamaanka labada Aqal ee dalka ka hor sheegay arrimo badan oo ay ka mid yihiin heshiisyadii siyaasadeed ee Madasha Qaranka iyo ansixinta Baarlamaanka ee afarta cutub ee ugu horreeyay Dastuurka oo uu xusay iney horseedeen hirgelinta qorshaha doorashooyinka tooska ah, lagana gudbayo doorashooyinkii dadbanaa ee caqabadda ku ahaa dowladnimada dalka.
Xasan Sheekh Maxamuud ayaa ugu baaqay Baarlamaanka Fedaraalka Soomaaliya in kalfadhigaan 6-aad ee maanta furmay lagu dhameystiro cutubyada dhiman ee Dastuurka, si looga gudbo khilaafaadka curyaamiyey dowlad dhiska Soomaaliyeed.
"Walaalayaal, dadka Soomaaliyeed annaga ayeey dhankeenna soo eegayaan, naguna aamineen waajibka ah in aan ka rarno meeshii ay ku raageen ee doorashada dadban. Waa inaan fursad u siinno in maskaxdooda xorowdo, fikirkooda xoroobo, ayna codkooda xorta ah ku soo doortaan ciddii matali lahayd. Waa garaad xumo inaan isku qancinno in loo laabto jidkii foosha xumaa ee magacaabidda iyo doorashooyinka dadban" ayuu yiri madaxweyne Xasan Sheekh Maxamuud.
Wuxuu sidoo kale xusay madaxweynaha in guushii deyn cafinta kadib ee dhamaadkii sanadkii 2023, in xoogga la saaray sidii Soomaaliya ay uga faa’iidaysan lahayd khayraadkeeda, waxuuna sheegay in dowladda Soomaaliya aysan wax deyn ah qaadan muddadii la soo dhaafay, islamarkaana ay ku dadaashay iney beekhaansato oo ay isku maarayso dhaqaalaha ka yimaada canshuuraha ay bixiyaan muwaadiniinta Soomaaliyeed.
Madaxweyne Xasan Sheekh Maxamuud ayaa sidoo kale ku bogaadiyey ganacsatada iyo guud ahaan canshuur bixiyayaasha Soomaaliyeed sida ay uga go'an tahay horumarinta iyo xasilinta dalka.